بطنــــــــــي يوجعني O_O

اليوم : الأحد .
الساعة: ٨ صباحاً .
التاريخ : ١٥/١٠/١٤٣٣ هـ
المناسبة : اليوم كان أول يوم لي بدون ماأداوم مع الناس اللي يدرسون T_T.... دراسة ...آآآآآه يالدراسة عمري مافكرت إني باشتاق
لك بهذا الشكل الفظيع ...

رجعت بي الذاكرة قبل ١٦ سنة يوم كنت أول ابتدائي ... كنت مجننّة أهلي وكل يوم يتكرر سيناريو البكي وكانوا يسحبوني
للمدرسة سحب كل يوم كذا لا هم استسلموا ولا أنا يئست من البكي ...
<< بصراحة مستغربة كيف عيوني مانشفت مع الكم الهائل اللي نزل منها من الدموع ...!!>>
أتذكر في يوم من الأيام صحيت من النوم وأنا أقول في نفسي .. اليوم ما بداوم لو وش يصير ..O_o   لبست المريول وأمي
تمشط شعري بشكل طبيعي ومسالم ولا كأني بعد شوي باطلق صفارات الإنذار اليومية ...
المهم أثناء ما أمي (( فديتها)) تمشط شعري أنا استجمع قواي التمثيلية لاستحظار الدموع .. بعد ما خلصت الوالدة
لفيت وقلت : أمي مابروح المدرسة بطــــــــــني ......... أمي فاهمة السيناريو طبعا وتقاطعني : يلا بلا دلع قومي يلا 
مافي غيــــــــــــاب لوتموتين وأنا لا أزال متمتعة بالأمل إنها تغير رأيها أقول لها بصوت تخنقه العبرة الكذّابة : 
أمي تــعـــــــــــــــــبااااانة ...!!!

وأمي ولا كأنها تسمع لأنها تدري إني أكذب ... فطرت مع البكاء الصامت ولبست الشنطة واحنا نمشي في الحوش والدموع أربع أربع وأنا أترجّى أمي ما أروح وأمي تسحبني .... سمعنا الوالد ونزل قال : خليها تغيب وأنا أطالع في أبوي وأقول

تعبــــــــــــــاااانة وأبكي ؟؟؟O_O   طبعا أمي متعودة ع هالأسلوب قالت : لأ مافي غياب ترى موب أول مرة تسويها

جلس أبوي يراضيني أروح المدرسة وأنا كل ماقالوا بتروحين أزيد الصياح ويرتفع الصوت ....

V

V

V

إلى أن عصّب الوالد وفي الأخير نادوا شغّالتنا وقالوا يلا وصّليها للمدرسة×_× أنا هنا حسيت إن كل جهدي بيروح هباءً وبلا فايدة أطلقت صيحة انتحارية كمحاولة أخيرة على أمل انها تنفع لكن للأسف مافي فايدة ...T_T
المدرسة كانت قريبة من بيتنا بدأت أنا والشغالة مسلسل السحب والصياح والبنات في الشارع كانوا مستغربين ايش الكائن
المجنون هذا مع الصبح ....!!
المهم كانت شغالتنا تسحبني بكل أمانة وأنا أبكي بكل ماأوتيت من قوة إلى أن قرّبنا من المدرسة أنا هنا قلت يابنت شكل مافي أمل
وخطر ف بالي أجلس في الأرض ولا أتحرك ....           
                                                     V
                                                     V

هنا شغالتنا استسلمت وقالت خلاص بنرجع للبيت ....^^

رجعنا للبيت و أنا للحين أسوي نفسي مسكينه ولا زلت أمثل إن بطني يوجعني وإني ماأكذّب ؟؟؟؟؟

وصلنا للبيت وكانوا أبوي وأمي متوقعين طلّتي البهية وينتظروني عند الباب ... يوم شافوني أبوي كان يضحك وأمي تقول :

والله ماتغيبين بكرة لو وش يصير ... أما أنا كمّلت بكي شوي بعدين رحت أنـــــــــــــااااااام بهدوء طفولي ولا كأني

سويت حروب قبل شوي ....

إخواني الكبار يوم رجعوا من مدارسهم كان أول سؤال داومت ولا غبت لأنهم كانوا شهود عيان عالمسلسل

بس ما لحّقوا ع النهاية لأنهم راحوا مدارسهم ...

واحنا عالغدا كانت أمي تحكّيهم وتقول لي بكره مافي غياب هاااه .... وأنا أقول إذا بطني مايوجعني بروح ^^ !!!

هذا يوم من أيام الإبتدائي عمري ما أنساه ... طبعا  في أيام غيره كثيييير بعضها كانت أختي الكبيرة تروح معي لأني

كنت أتطمن إذا راحت معي وأرتاح ... توصّلني للمدرسة وتجلس معي إلين أتعوّد عالجو وبعدين ترجع للبيت ...

الله يسامحني بس ...

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

ياااااااااا الله ياذكريات الدراسة لو كنت أدري إنه بيجي يوم أجلس جلستي هذي وأشتاق للدراسة ماكنت ببكي

أبد << أشك O_o

اليوم تذكرت أيامي في الدراسة (( ابتدائي .. متوسط .. ثانوي .. جامعة )) وموب مصدقة إني خلّصت هالأيام

لأول مرة أحس إني فــــــــــاضية بكل ماتحمله الكلمة من معنى هذا الشعور كنت أتمناه وأشتاق له أيام ضغط

الإمتحانات لكنه طلع شعور مش ولا بد T_T  ....

أتذكر في يوم من أيام الجامعة  كانت أيام امتحانات وواحدة من صديقاتي كانت تقول :

((يااااااااا الله  أحتاج جرعة تفاهة متى أصحى من النوم وألاقي نفسي فــــــــاضية ولا أدري وش أسوي

أففففففف متى يجي هاليوم ))

واليوم حسيت بجرعة التفاهة والفضاوة اللي كنا نتمناها وكل اللي صار اليوم إني صحيت من النوم

أصوّر أختي وبنت أخوي وأجلس أكتب ذكريات فقط لا غير ..T_T 

 بدون ما أستعد ليوم دراسي جمــــــــــــــــــــــــــــــــيل ....×_×

,,,,,,,,,,,,,,,,,,,,,,,,,,,,,,,,,,,,,,,,,,,,,